"Mae dwyieithogi'r diwylliant Cymraeg yn gyfystyr â'i danseilio a'i ddirymu, ac yn troi'r Gymraeg yn gyfrwng di-werth. Mae'r sawl sy'n gwthio dwyieithrwydd corfforaethol i mewn i'r cylchoedd diwylliannol Cymraeg hynny sy'n fydoedd cwbl Gymraeg ac yn rhoi cynhaliaeth i werthoedd y diwylliant, yn gweithredu'n gwbl anghyfrifol a rhaid eu gwrthwynebu." (Ieuan Wyn)

Yn groes i'r arferiad, pan gafwyd cerddi Cymraeg yn unig gan Myrddin ap Dafydd a Meirion Mcintyre, comisiynwyd Bardd Plant Cymraeg eleni i lunio cerdd Saesneg yn ogystal ag un Gymraeg. A phwy sydd ynghlwm wrth y datblygiad hwn gyda Chyngor Llyfrau Cymru a'r Urdd, ac yn derbyn cyfrifoldeb am ymddangosiad y gerdd ac yn hyrwyddo'r fenter? Wel, Planed Plant, - ac S4C, awdurdod a sianel sydd i fod drwy ddeddf i hyrwyddo'r Gymraeg yn unig. Anfonwyd y gerdd Saesneg, ar ffurf poster yn nodi enwau noddwyr, i ysgolion Cymru. Dyma enghraifft amlwg o S4C yn camddefnyddio'i henw, ei safle a'i dylanwad fel sianel i hyrwyddo'r Saesneg er ei bod wedi ei sefydlu gyda'r bwriad o gynnal gwasanaeth cyhoeddus Cymraeg wyneb yn wyneb â dylanwad gormesol yr iaith a'r diwylliant Saesneg, ac mai'r rheswm dros frwydro amdani oedd er mwyn ceisio gwrthweithio effeithiau niweidiol y grymusterau sy'n Seisnigo Cymru drwy gael sianel a fyddai'n hyrwyddo'r iaith a'r diwylliant Cymraeg.

Mae dwyieithogi'r diwylliant Cymraeg yn gyfystyr â'i danseilio a'i ddirymu, ac yn troi'r Gymraeg yn gyfrwng di-werth. Mae'r sawl sy'n gwthio dwyieithrwydd corfforaethol i mewn i'r cylchoedd diwylliannol Cymraeg hynny sy'n fydoedd cwbl Gymraeg ac yn rhoi cynhaliaeth i werthoedd y diwylliant, yn gweithredu'n gwbl anghyfrifol a rhaid eu gwrthwynebu. Mae marwolaeth y diwylliant Cymraeg, a marwolaeth y Gymraeg yn sgil hynny, ymhlyg yn y datblygiad.